New Back stage and Text Effects

السلام عليكم
فاكرين زمان لعبة الاختلافات؟ كنا نشوف في المجلات صورتين متشابهتين تقريبا، الاختلافات اللي بينهم  اختلافات مش واضحة للوهلة الأولى، أي حد وهو معدي لو بص لهم ومش هيقول انهم شبه بعض، لكن لو دقق فيهم شوية هيعرف ان فيه اختلافات موجودة

تيجو نلعبها؟

تعالوا نبص على الصورة دي

 

الصورة بتوضح زي ما لاحظنا جزء من ال Home tab  في ال Ribbon  الخاص باصدار وورد 2007 و 2010

يا ترى ايه الاختلافات بين الاتنين؟

1- كان عندنا في وورد 2007 وفي منتجات اوفيس 2007 عموما Office Button  اللي مايكروسوفت لغته في اوفيس 2010 وحل محله ال Backstage view او زي ما بعض الناس بتسميه File tab

طيب وايه الميزة في كدة؟ حاجات كتير

أولا: لما تم تقديم Office Button في أول ظهور لباقة اوفيس 2007 كتير من الناس في الانطباع الاول ما فكروش في ان دة جزء من البرنامج، هما جه في ظنهم ان دة شعار البرنامج فقط ومالوش أي وظيفة تانية، ناس كتير ما فكرتش تضغط عليه

ثانيا: طيب الناس دي سألت الاسئلة الطبيعية، امال فين الاوامر الخاصة بإنشاء وحفظ الملفات وطباعتها ادارتها بالطرق المختلفة، طبعا كانت الاجابة ان دة مش مجرد شعار يا جماعة، دة Office Button !!

ثالثا:  الناس اللي اشتغلت لفترات طويلة على اوفيس 2003 وما قبله حفظت انك اول ما تفتح البرنامج، لازم تلاقي على الشمال فوق كلمة File  ، لمدة تزيد عن 6 سنين واكتر كمان كان الوضع دة قائم، التغيير البسيط دة كان صعب على جماهير من الناس انها تتقبله، علشان كدة مايكروسوفت قدمت لنا البديل تحت نفس الاسم اللي الناس افتقدته: File

رابعا: ودي حاجة مهمة جدا، التطوير اللي أدخلته مايكروسوفت على الجزء دة من البرنامج مكنها من إرفاق مساحة معاينة الملف قبل الطباعة في نفس الصفحة اللي فيها امر الطباعة واعدادات الورقة وضبط اعدادات الطباعة، ودي حاجة مهمة جدا لأن المستخدم لأول مرة في اصدارات مايكروسوفت اوفيس بيقدر يعاين شكل الورقة قبل الطباعة في نفس اللحظة اللي بيعدل فيها اعدادات الطباعة، ودة ما كانش موجود قبل كدة، ويمكن نتكلم عن الطباعة بالتفصيل بعد كدة لتوضيح الننقطة دي بالتفصيل

الاختلاف دة موضح في الصورة بالمربع الأحمر المحيط بكلمة File  في وورد 2010 وبال Office Button في اوفيس 2007

2-  الاختلاف التاني بين الصورتين: هو وجود أيقونة حرف A  الخاصة بتأثيرات النص او Text effects في Word 2010  والغير موجودة في Word 2007  ، ودي أداة جديدة تقدم لأول مرة في اصدار 2010 ، هي شبيهة إلى حد ما بال Word Art لكن تختلف عنه في حاجتين:

أولا: ان ال Word Art  موجود في Word و غيره زي Powerpoint  مثلا ، وتقدر تنسخ النص المطبق عليه Word Art  من ملف إلى ملف آخر من تطبيق آخر من تطبيقات Office 2010 مع الاحتفاظ بتطبيق ال Word Art عليه، لكن بالنسبة للتأثيرات او ال   Text effects فمش بتتعرف عليها باقي تطبيقات Office 2010

ثانيا: ان ال Word Art  بتتوجه للأمر أولا وبعدين تكتب النص، أما في Text effects  بتكتب النص الأول وبعدين تقدر تطبق التأثير، ودي حاجة مهمة بتساعد المستخدم انه يطبق ال Text effect على جزء من سطر من فقرة، بدون ما يضطر يستخدم ال Word Art  ويظبطه بين النص او داخل الفقرة

كل دة في جزء بسيط من Home tab في أحد التطبيقات الأساسية في البرنامج، ما بالكم بقى لو دققنا في كل ال tabs في كل تطبيقات الأوفيس… يبقى للحديث بقية إن شاء الله